Skip to toolbar

Course Code

Course Name

Course Duration

No of Credits

SLQF Level

Location

DAT

Applied Tamil Diploma (ව්‍යවහාරික දෙමළ භාෂා ඩිප්ලෝමා පාඨමාලාව)

1 Year

30

3

On University | Online

Applied Tamil Diploma (ව්‍යවහාරික දෙමළ භාෂා ඩිප්ලෝමා පාඨමාලාව)

User Avatar
Free
Diploma in Applied Tamil Language

ඩිජිටල් අධ්‍යාපන හා වෘත්තිය සංවර්ධන මධ්‍යස්ථානය මගින් සංවිධාන කරනු ලබන ව්‍යවහාරික දෙමළ භාෂා ඩිප්ලෝමා පාඨමාලාව, ශ්‍රී ලංකාවේ පවතින සිංහල, දෙමළ, ඉංග්‍රීසි යන රාජ්‍ය භාෂා ත්‍රිත්වය අතුරෙන් දෙමළ භාෂාව කේන්ද්‍ර කර ගනිමින් පවත්වයි. ඒ අනුව දෙවන භාෂාවක් ලෙස දෙමළ භාෂාව අධ්‍යයනය කිරීමේ වරප්‍රසාදය මෙම පාඨමාලාවෙන් අභ්‍යන්තර හා බාහිර ශිෂ්‍යයන්ට හිමි වේ. කාලීන අවශ්‍යතාව මත විශ්වවිද්‍යාලයකින් ශිෂ්‍යයකු ලබාගන්නා උපාධියත් සමග ඔහුට හෝ ඇයට අමතර සුදුසුකමක් ප්‍රදාන කිරීම මෙමගින් සිදු වන අතර එය විද්‍යාර්ථියාට හිමිවන සුවිශේෂ වරප්‍රසාදයක් ලෙස සැලකිය හැකිය. එසේම බාහිර ශිෂ්‍යයකුහට සිය වෘත්තිය අවශ්‍යතා සාක්ෂාත් කරගනු වස් රජයේ විශ්වවිද්‍යාලයකින් පිරිනමනු ලබන උසස් ප්‍රමිතියෙන් යුක්ත මෙබඳු ඩිප්ලෝමා පාඨමාලාවක් හැදෑරීමටද මෙමගින් අවකාශ සැලසේ.
බහුවාර්ගික රටක ජීවත් වන පුද්ගලයන් ලෙස අනෙක් ජාතීන් සමග අන්‍යෝන්‍ය සබඳතා වර්ධනය කිරීමට හා පුද්ගල සහජීවනය ඇති කිරීමට භාෂාත්මක සන්නිවේදනය ඉතා වැදගත් වේ. පුද්ගලයකු ස්වකීය භාෂක සමාජය සමග සන්නිවේදන කටයුතු සඳහා මව් භාෂාව දැන සිටීමත්, වෙනත් ජන කොට්ඨාස හා සම්බන්ධව කටයුතු කිරීම සඳහා දෙවන භාෂාවක් හෝ භාෂා කිහිපයක් දැන සිටීමත්, ලෝකය සමග කටයුතු කිරීමේදී ජාත්‍යන්තර භාෂාව දැන සිටීමත් අත්‍යවශ්‍ය ය. ඒ අනුව මෙකී පාඨමාලාව ආශ්‍රයෙන් ශිෂ්‍යයකුහට තිබිය යුතු දෙවන භාෂාවක් දැන සිටීමේ අවශ්‍යතාව සපුරාලීමට අදහස් කෙරේ.

පාඨමාලා ඉගෙනුම් ඵල

මෙම පාඨමාලාව හැදෑරිය යුත්තේ ඇයි?

ව්‍යවහාරික දෙමළ භාෂා ඩිප්ලෝමා පාඨමාලාව මගින් ඩිප්ලෝමාධාරියාට දෙමළ අක්ෂර භාවිතය හා ව්‍යාකරණ අවබෝධය, සාහිත්‍යාවබෝධය, දෙමළ සංස්කෘතිය පිළිබඳ දැනීම, කෘති පරිශීලන හැකියාව, පරිවර්තනය හා පරිවර්තන ක්‍රම පිළිබඳ අවබෝධය, ප්‍රායෝගික ලේඛන හැකියාව හා කථන හැකියාව යනාදි ක්ෂේත්‍ර පිළිබඳ දැනුම ලබා දෙනු ලැබේ.

කා සදහාද?

ඔබ,
■ දෙමළ භාෂාධ්‍යයනය සඳහා කැමැත්තක් දක්වන්නේ ද?
■ රාජ්‍ය සේවය සඳහා වන දෙමළ භාෂා අවශ්‍යතාව සපුරා ගැනීමේ අභිලාෂයෙන් පසුවන්නේ ද?
■ තමන් ජීවත් වන භාෂක සමාජයේ අවශ්‍යතාව මත දෙමළ භාෂාව ඉගෙනීමට බලාපොරොත්තු වන්නේ ද?

ඔබගේ මෙම අපේක්ෂා සඵල කර ගැනීම සඳහා සුදුසු වන්නේ ව්‍යවහාරික දෙමළ භාෂා ඩිප්ලෝමා පාඨමාලාව යි.

ඉගැන්වීම් ක්‍රමවේදය

ඉරිදා දිනවල පෙරවරු 8.00 සිට පස්වරු 4.30 තෙක් ශ්‍රී ජයවර්ධනපුර විශ්වවිද්‍යාලයේ දී හෝ මාර්ගගත ක්‍රමවේදයෙන් පැවැත් වේ. මාර්ගගත දේශන, ඩිජිටල් අධ්‍යාපන හා වෘත්තිය සංවර්ධන මධ්‍යස්ථානයේ ඉගෙනුම් කළමනාකරණ පද්ධතියෙන් (LMS) හා ZOOM මෘදුකාංගය ඔස්සේ පවත්වනු ලැබේ. පාඨමාලාව සඳහා තේරී පත් වන සිසුන්හට ඉගෙනුම් කළමනාකරණ පද්ධතියට (LMS) සම්බන්ධ වී අධ්‍යයන කටයුතු සිදු කළ හැකි ය.

ප්‍රවේශය සඳහා අවශ්‍ය සුදුසුකම්

අභ්‍යන්තර ශිෂ්‍යයන් සඳහා
මානවශාස්ත්‍ර හා සමාජීයවිද්‍යා පීඨයෙහි සාමාන්‍ය හෝ විශේෂ උපාධි හදාරන තෙවැනි වසර ශිෂ්‍යයකු වීම.

 බාහිර ශිෂ්‍යයන් සඳහා
අධ්‍යයන පොදු සහතික පත්‍ර (උසස් පෙළ) විභාගය ඕනෑම විෂය ධාරාවකින් විෂයයන් තුනක් සඳහා අවම වශයෙන් එක් වරකදී සාමාන්‍ය සාමර්ථ්‍යය තුනක් සහිතව සමත්වීම
හෝ
අධ්‍යයන පොදු සහතික පත්‍ර (උසස් පෙළ) විභාගය ඕනෑම විෂය ධාරාවකින් විෂයයන් දෙකක් සඳහා අවම වශයෙන් එක් වරකදී සාමාන්‍ය සාමර්ථ්‍යය දෙකක් සහිතව සමත්වීම සහ පිළිගත් ආයතනයක වසරක වෘත්තියමය පළපුරුද්දෙන් යුතු වීම (විශ්වවිද්‍යාලයීය සනාතන සභාවේ අනුමැතියට යටත් ව පිළිගත් ආයතන පමණක් මෙහිදී සලකා බැලේ.)
හෝ
ජාතික වෘත්තිය සුදුසුකම් (NVQ) සිවුවැනි ස්තරය සහිත පදනම් පාඨමාලාවක් සම්පූර්ණ කර සිටීම. (විශ්වවිද්‍යාලයීය සනාතන සභාවේ අනුමැතියට යටත් වූ පදනම් පාඨමාලා පමණක් මෙහිදී සලකා බැලේ.)
හෝ
අවම වශයෙන් වසර 12ක පාසල් අධ්‍යාපනය සම්පූර්ණ කර යෝග්‍යතා පරීක්ෂණයක් සමත් වී තිබීම හා ශ්‍රී ලංකා යෝග්‍යතා මාර්ගෝපදේශ (SLQF) දෙවැනි ස්තරය සහිත පදනම් පාඨමාලාවක් සම්පූර්ණ කර සිටීම.

තෝරාගැනීමේ පටිපාටිය

පාඨමාලා ගාස්තු

අයදුම් කරන ආකාරය

පාඨමාලා ව්‍යුහය

පළමු අර්ධ වාර්ෂිකය

  • අක්ෂර මාලාව
  • උච්චාරණ විධි
  • ඉලක්කම් හා සර්ව නාම
  • ප්‍රශ්නවාචක පද සහ ප්‍රශ්නවාචක අක්ෂරය
  • ඒකවචන හා බහුවචන පද භාවිතය
  • පිණිසාර්ථ ක්‍රියා
  • කාල භේදය
  • පූර්ව ක්‍රියා, මිශ්‍ර ක්‍රියා හා විධි ක්‍රියා
  • විභක්ති
  • සන්ධි
  • සම්බන්ධකාරක පද
  • ක‍ර්මකාරක හා කර්තෘකාරක වාක්‍ය
  • ක්‍රියානාම හා ක්‍රියා විශේෂණ
  • නාම නාම හා නාම විශේෂණ
  • පෞද්ගලික ලිපි
  • රාජකාරි ලිපි
  • සාරාංශකරණය
  • දැන්වීම් හා අත් පත්‍රිකා
  • දෙබස් නිර්මාණය
  • අයදුම්පත් සැකසීම
  • රචනා හුරුව
  • දෙමළ භාෂාවේ වාග්විද්‍යාත්මක ස්වරූපය
  • භාෂා ද්විරූපතාව
  • සරල වාක්‍ය පරිවර්තනය
  • සංකීර්ණ වාක්‍ය පරිවර්තනය
  • කෙටි හා දීර්ඝ ඡේද පරිවර්තනය
  • දෙබස් ශ්‍රවණය හා පුහුණුව
  • සිද්ධි අධ්‍යයනය
  • කාව්‍ය/ගීත ශ්‍රවණය හා රසවින්දනය
  • කෙටි සිනමාපට රසවින්දනය

දෙවන අර්ධ වාර්ෂිකය

  • පැරණි දෙමළ සමාජය (සමාජීය, ආර්ථික, දේශපාලන, අධ්‍යාපන හා සංස්කෘතික)
  • නූතන දෙමළ සමාජය (සමාජීය, ආර්ථික, දේශපාලන, අධ්‍යාපන හා සංස්කෘතික)
  • සාහිත්‍ය යුග වර්ගීකරණය
  • තිරුක්කුරළ් හා එහි ඉගැන්වීම්
  • ගීත පරිවර්තනය
  • කෙටිකතා පරිවර්තනය
  • රවෘත්ති පරිවර්තනය
  • ප්‍රායෝගික ලේඛන පරිවර්තනය
  • පංච මහා කාව්‍ය හා ද්විත්ව කාව්‍ය විවරණය
  • වීර කාව්‍ය විවරණය
  • නූතන දෙමළ ගද්‍ය සාහිත්‍යය
  • නූතන දෙමළ පද්‍ය සාහිත්‍යය
  • ප්‍රාදේශීය ව්‍යවහාර අධ්‍යයනය
  • මාතෘකානුකුල කථනය
  • සම්මුඛ පරීක්ෂණ උදෙසා කථනය
  • ක්ෂණික ප්‍රශ්නෝත්තර සාකච්ඡා
  • වෘත්තියමය සාකච්ඡා

මේ සඳහා සිද්ධි අධ්‍යයන (Case Studies) පදනම් කරගත් ව්‍යාපෘති සලකා බැලෙන අතර එහි ඇගයීම් කටයුතු කොටස් දෙකකින් යුක්තව සිදු කෙරේ. ඒ අනුව ඩිප්ලෝමා අපේක්ෂයා, තම පර්යේෂණය පිළිබඳව වචන 2000ක පමණ වාර්තාවක් දෙමළ භාෂාවෙන් සකස් කළ යුතු අතර ඒ සඳහා ලකුණු 80% ක් හිමිවේ. ඒ හැරුණු විට ව්‍යාපෘතිය පිළිබඳව ශිෂ්‍යයා සම්ප්‍රවේශනයක් (Presentation) සිදු කළ යුතු අතර ඒ සඳහා හිමිවන ලකුණු ප්‍රමාණය 20% කි. ව්‍යාපෘතිය සඳහා අවැසි නියැදිය ශිෂ්‍යයාට ස්ව අභිමතය පරිදි තෝරාගත හැකිය. එසේ තෝරාගත් නියැදිය පාදක කොට ගනිමින් සිදු කෙරෙන අධ්‍යයනයේදී අප විසින් ලබාදෙනු ලබන නිර්ණායක මත පදනම්ව කටයුතු කිරීම අවශ්‍ය වේ. ව්‍යාපෘති මාර්ගෝපදේශනය යටතේ අපේක්ෂකයා විසින් සිදු කරනු ලබන ව්‍යාපෘතිය සඳහා අදාළ ශාස්ත්‍රීය අධ්‍යයන ක්‍රම හා රචනා විධික්‍රම පිළිබඳ මග පෙන්වීම අප විසින් සිදු කරනු ලැබේ.

Tamil Language Additional Resources

Disclaimer: All these books are from the Department of Official Languages of Sri Lanka.

පාඨමාලා ගාස්තු

රු. 35,000
  • අභ්‍යන්තර සිසුන් සඳහා
රු. 70,000
  • බාහිර සිසුන් සදහා
Translate (පරිවර්තනය සඳහා)